主页 > S哇生活 >【盘房来料】恒指250日线暂仍未见影 >

【盘房来料】恒指250日线暂仍未见影

【盘房来料】恒指250日线暂仍未见影放大图片

中美双方互抛橄榄枝,中国先豁免部份美国进口商品关税,美国就延迟加徵3000亿美元中国进口商品关税,双方喺10月初第13轮谈判前释出善意,贸易战气氛继续缓和。可惜港股唔知係咪噚日升定咗先,今朝高开后,未能完全回补8月2日所遗下嘅巨型裂口,高位见回吐,250日线当然继续无影,半日走势较为反覆。

恒指高开124点,见27283点已经係半日高位,虽然亦为8月初以嚟高位,可惜无以为继更调头向下,一度再失二万七关,最多跌191点,见过半日低位26967点。中午恒指报收27118点,跌40点;国指则升30点,半日报收10595点。

重磅股个别发展,腾讯(00700)一度重上350元,但以前都讲过350-355元係短期巨大阻力位,边有话咁易突破,半日报收349.2元,升幅唔够1%。至于升咗几日嘅大笨象(00005)则回吐近1%,暂守60元大关。其他重磅股表现麻麻,只有平保(02318)半日仍录得0.6%升幅。

港交所(00388)较受市场注目,噚日宣布以近2900亿元天价收购伦敦交易所(LSE),如意算盘未知打唔打得响,但股价则应声而下,半日急挫3.6%,大成交下跌相当湿滞。噚日小加同志喺收市后而电话会议向分析员解释呢单世纪大刁,竟以罗密欧同茱丽叶嚟形容港交所跟伦交所关係,众所周知呢对莎翁笔下恋人结局,比悲伤更悲伤,今次港交所提出嘅收购计划睇嚟都係冻过水。

先睇睇伦交所对港交所收购建议嘅回应係「不请自来的、初步的、高附加条件」方案,纯睇字面意思,意味住伦交所对于收购建议唔多likely,其中一项条件係要刹停伦交所早于7月提出向Refinitiv收购,即係人哋本来好地地有段大好姻缘,家下你嚟抢亲,伦交所唔满意好正常。而伦交所亦已放风,无打算放弃呢项收购计划,如此一来经已无得倾。

唔睇表面呢头亲事双方条件难以吻合,深一层喺政治层面上,亦唔见得米字旗国会就範,皆因伦交所为伦敦呢个国际金融中心三大支柱之一,肯定当地政府基于国家安全考虑,唔会咁轻易批准呢项交易。即使米字旗国要面对脱欧,亦唔代表欧盟对呢项交易会置之不理,甚或美国海外投资委员会(CFIUS)亦有机会差只脚埋嚟。

查实早于2000年开始,德意志交易所、纳斯达克交易所、瑞典OM Gruppen、抑或洲际交易所等,都曾对LSE起痰,提出过併购计划,可惜无不铩羽而归,唔见得港交所有特异功能可以打破诅咒。小加同志用得罗茱之恋嚟形容今次交易,唔知係咪畀定贴士大家,港交所捱沽亦属意料中事。

至于之前受累贸易战嘅出口股,喺中美双方关係有所缓和之际见反弹,预期喺下月谈判前,有关贸战敏感股,应该可以做番好啲。医药股调整咗个几星期,今日摆脱弱势见反弹,其实阿Man一直睇好呢个板块,每次调整就係入市机会,只係要留意唔少医药股今年累积一定升幅后,估值已唔算便宜,小注怡情还可以,现水平已过咗可以大注博命嘅时候。

麦狄文
(徐狄怡‧证监会持牌人)

上一篇: 下一篇: