主页 > Q半生活 >【盘房来料】新房策利好本地银行及地产股 >

【盘房来料】新房策利好本地银行及地产股

【盘房来料】新房策利好本地银行及地产股放大图片

中美贸易谈判再生变数,中国要求美国先撤回关税,先向美国再买500亿美元农产品,不过美国方面暂时未见有任何回应。其实阿Man之前都讲过,中美双方之间嘅矛盾,唔少都係鸡先定蛋先嘅问题,双方要真真正正达成协议谈何容易,美股因此喺业绩公布理想下,表现较为反覆。

不过港股表现则甚为出色,主要係得到《施政报告》里面,房屋政策嘅「德政」加持,由陀地地产股带动,上闯二万七大关。恒指高开144点后,升幅一度收窄至65点,见过半日低位26729点。不过其后升势再度回勇,最多曾升292点,见26956点,逼近二万七关,创逾9月16日以嚟超过一个月高位。中午恒指报收26862点,升198点;国指则升41点,半日报收10574点。

蓝筹重磅股个别发展,但最大晒士几件大只佬全部向上,友邦(01299)半日升1.4%,大笨象(00005)则升1.3%,企稳于60元之上。至于腾讯(00700)似乎呢期就弱咗啲,半日仅升0.1%,目前只係叫企稳喺330元之上,可惜欠缺上升动力。

今次施政报告嘅所谓「德政」,当然係讲紧放宽首置嘅按揭成数,估计能吸引首期唔多够,但具供款能力嘅高收入未上车一族再考虑置业。先唔讲究竟有冇高收入人士肯落搭,但大摩已嗱嗱声出咗份报告,唱好陀地地产股,指新措施对私人住宅需求及楼价有支持作用,对地产股属正面消息。而相关股份升幅由1.8%至4.3%不等,由于新世界(00017)坐拥最多农地,发展新界农地有助陀地地产股嘅土地价值得到提升及反映,资金仆倒去支持呢个板块。不过阿Man认为喺近日二手楼市交投转趋淡静下,放宽按揭措施,最大得益应该係物业代理,所以美联物业(01200)噚日升逾一成后,今日再录得超过一成升幅。

另一方面,加大物业按揭成数,银行变相多赚利息,至于风险嘅嘢就摆埋一边唔理住,反正本地楼价经过超过四个月嘅社会运动下,亦仅轻微下调,边得嚟咁多负资产,本地银行股亦跟住炒上。其实对于新嘅房屋政策,阿Man唔认为可以解决目前嘅房屋问题,不过呢就相当同意大摩报告嘅观点,始终有人辞官归故里,有人漏夜赶科场,首期少咗确係令唔少高收入,但唔够首期嘅人士上车容易咗。至于乜嘢楼市泡沫呀,担心负资产影响银行呆坏帐呀,一日未发生,又点可以咁多假设。而短线嚟讲对本地银行及地产股係好消息,缸边友饿咗一排无乜好炒,仲唔乘机炒番转至笨。不过对于有能力以较少首期上车嘅无壳蜗牛,係咪要趁呢个政策实施把握上车机会,阿Man就唔畀意见喇,毕竟香港係一个自由经济市场,well,暂时都仲係,目前选择上车,供足30年后,就已过咗2047年呢个50年不变大限,30年后香港乜嘢世界,无水晶球答你唔到。总之上车后,未来楼价升好跌好,都记得今日决定係自己造成他日嘅果,千祈咪又输打赢要就得喇!

麦狄文
(徐狄怡‧证监会持牌人)

上一篇: 下一篇: